Waziri wa Afya, Mhe. Ummy Mwalimu ameagiza Taasisi ya Saratani ya Ocean Road (ORIC) kuanza kutoa matibabu ya PET -CT Scan ifikapo Februari Mosi Mwaka huu, kutokana na kukamilisha kwa jengo la kutoa huduma hiyo na kufungiwa mashine hiyo ya mionzi, kwani sababu kubwa ya wagonjwa wengi wa saratani kwenda kutibiwa nje ya nchi.

Waziri Ummy aliyasema hayo mapema leo alipofanya ziara hapa Taasisi ya Saratani Ocean Road na kukagua jengo jipya litalotumika kutoa huduma za mionzi ikiwemo PET CT, pamoja na Cyclotron.

Aidha waziri Ummy Alisema kuwa wataendelea kuboresha huduma zaidi hususan kujenga wodi nzuri zenye ubora, kuhakikisha wanawavutia watu wa viwango tofauti vya maisha kuja kutibiwa nchini.

Waziri Ummy alisema serikali itaendelea kuwekeza zaidi katika Taasisi hiyo, kuhakikisha inaboresha huduma zake na miundombinu, ili watanzani wapate huduma bora za matibabu ya saratani.

Kuhusu kuanza kwa mashine ya PET CT Scan, aliwataka kuhakikisha wanaanza huduma hizo za matibabu haraka kutokana na kukamilika miundombinu ya kutolea huduma, ambapo atawaomba kiongozi mmoja kuizindua ili kuanza rasmi kutoa huduma kwani ndio sababu kubwa ya wagonjwa hao kwenda nje ya nchi.

Katika hatua nyingine waziri Ummy aliagiza ORCI, kuhakikisha wanaanza kutoa huduma za upasuaji wa saratani ili kuwaepushia usumbufu wagonjwa kuzunguka katika hospitali zingine, wakati wangependa kutibiwa hospitalini hapo na kumaliza kila kitu.

“Mmenambia kila kitu mnacho, chumba kipo mtaalamu mnaye, hivyo hadi kufika Julai Mosi, muwe mmeanza kutoa huduma hii, mana hiyo itakuwa inaakisi dhamira nzima ya Taasisi hii ya saratani na umahiri wake wa kuwa kituo bora cha umahiri wa kutibu saratani na kutokana na uwekezaji mkubwa wa serikali hususani katika mashine za mionzi,” alisema

Alisisitiza kuwa, serikali itaendelea kusikiliza Taasisi hiyo katika kuwajengea uwezo hivyo na wao wahakikishe wanatanua utoaji wa huduma na kuwajengea uwezo wataalamu katika hospitali za Kanda na mikoa.

Katika hatua nyingine Waziri Ummy, ameipongeza Taasisi ya Saratani Ocean Road kwa utoaji huduma bora zilizopunguza malalamiko kwa wananchi na kusaidia Watanzania wengi kupitia huduma zinazopatikana katika hospitalini hapo.

Kwa upande wake Mkurugenzi Mtendaji wa ORCI, Julius Mwaiselage alimshukuru Waziri Ummy kufanya ziara katika taasisi hiyo huku akimpongeza kwa kazi kubwa anayoifanya ya kuwaletea fedha za ujenzi wa miundombinu.

Alisema kwasasa wanayo mipango mbalimbali ya kujenga jengo jipya katika eneo la tasisi hiyo, huku wakiendelea na mipango ya kuandaa michoro ya ujenzi wa majengo ya kutoa matibabu ya saratani Dodoma na Mbeya.

Naye Mkurugenzi wa Huduma za Tiba, Dk.Mark Mseti alisema wataendelea kuboresha huduma za matibabu kwa wananchi ikiwemo kutoa msamaha kwa wagonjwa wasio na uwezo.

Leo ikiwa ni kilele Cha mkutano wa kimataifa wa kisayansi wa magonjwa yasiyoambukiza katika ukumbi wa mikutano wa Julius Nyerere Dar es Salaam.

Katika mkutano huo madaktari kutoka Taasisi ya Saratani Ocean Road nao wamepata nafasi ya kuwasilisha mada zao.

Madaktari hao Ni Dkt. Harrieth Noah, Dkt. Felister Tupa na Dkt. Goodfrey Malangwa.

Pia wakati huo huo wa mikutano Banda la Taasisi ya Saratani Ocean Road limekuwa likitoa Elimu kuhusiana na Saratani.

Aidha ikumbukwe kuwa Taasisi ya Saratani Ocean Road hivi karibuni imepokea tuzo ya heshima ya kutambulika mchango wake katika kutoa elimu, kufanya uchunguzi na matibabu ya Saratani.

Mkurugenzi Mtendaji wa Taasisi ya Saratani Ocean Road Dkt.Julius Mwaiselage leo amepokea msaada wa millioni arobaini kutoka Bodi ya michezo ya kubahatisha Tanzania (GBT).

Bodi ya michezo ya kubahatisha Tanzania (GBT) imetoa msaada huo katika kuadhimisha miaka ishirini ya Bodi hiyo ya michezo ya kubahatisha Tanzania.

Bodi hiyo imetoa bedside Mia moja zenye thamani ya Shilingi milioni ishirini na nne, Hundi yenye thamani ya Shilingi milioni kumi na tano pamoja na vifaa mbalimbali ikiwemo sabuni na maji.

Akitoa shukrani zake Dkt. Mwaiselage amesema msaada huo utakwenda kuimarisha maeneo ya ugonjwa, pamoja na kwa wagonjwa moja kwa moja.

Pia Dkt. Mwaiselage ameahidi msaada huo utakwenda pale ulipokusudiwa kwa Usimamizi madhubuti huku akitoa wito kwa wadau wengine kuleta misaada zaidi na milango ya Taasisi ipo wazi kupokea misaada mbalimbali.

Kwa upande wake Mkurugenzi wa Bodi ya Michezo ya kubahatisha Tanzania (GBT) Bw. James Mbalwe amesema katika kusaidia Jamii ni Jambo la lazima sio hiari, ndio mana wao wameamua kurudisha kile kidogo walichopata kwa jamii.

Bw. Mbalwe ameongeza kuwa kujitolea kwa kutoa misaada kwa pamoja italeta tija kubwa kwa Jamii inayotuzunguka.

Aidha Bodi hiyo ya Michezo ya kubahatisha Tanzania (GBT) imeambatana na wadau wa michezo hiyo ya kubahatisha nchini katika kutoa misaada hiyo.

Afisa miradi wa shirika la kimataifa la nguvu za Atomic Bi.Aza Kashlan amesema kuwa pamoja na msaada wa mashine walizozitoa kipindi cha nyuma, ila bado wataendelea na kutoa misaada mbalimbali ikiwemo mashine kwa namna itakavyowezekana ili kurahisisha matibabu katika Taasisi ya Saratani Ocean Road.

Akizungumza na mwandishi wa habari hii, Bi. Kashlan amesema mapema mwakani kutakuwa na mradi mwingine mkubwa ambao wanategemea pindi ukikamilika watauleta hapa katika Taasisi hii.

Akizungumza katika majadiliano maalum yaliyofanyika katika ukumbi uliopo ofisini kwake, mkurugenzi mtendaji wa Taasisi ya Saratani Ocean Road Dkt Julius Mwaiselage amesema kuwa ujio wa kiongozi huyu umempa nafasi ya kuzungumza nae mambo mbalimbali ikiwamo, kuanzisha shahada ya uzamili kwenye fizikia tiba, ununuzi wa vifaa mbalimbali vya kitabibu mfano, mashine za tiba n.k pqmoja na mafunzo upande wa uchunguzi kwenye mambo ya CT Scan.

Bi. Kashlan ameahidi kuitekeleza miradi yote ambayo Dkt. Mwaiselage amemuomba pindi tu muda utakapofikia kwa kuanzia na mambo kadhaa mapema mwakani.

Taasisi ya Saratani ya Ocean Road imeanza kutoa huduma ya mionzi tiba ya ndani kwa njia ya kisasa (3D INTRACAVITARY BRACHYTHERAPY) kwa wagonjwa wa saratani ya mlango wa kizazi.

Hayo yamesemwa wiki hili na Dkt Faraja Kiwanga ambaye ni daktari bingwa wa saratani kutoka kliniki ya Bima (HIC) alipokuwa akiwasilisha maada na kuitambulisha huduma hiyo ambayo imeanza kutolewa katika Taasisi kuanzia mnamo mwezi wa tano mwaka huu 2023.

Huduma hii ni ya kibingwa bobezi ambayo inatumia vifaa vya kisasa kuanzia kwenye kumuandaa mgonjwa, kumuwekea vifaa tiba kwa ajili ya mionzi, kutumia kipimo cha CT scan kuangalia kama vifaa tiba vimekaa mahali pake vizuri, pia kutumia picha za CT scan kufanya kontua kwenye sehemu ambapo ugonjwa upo na kufanya kontua kwenye ogani zinazokaribia eneo linalotakiwa kupata tiba ya kutosha na bila kuathiri ogani zilizokaribu, pia kutumia picha za CT scan kupanga tiba na kufanya mahesabu ya dozi ya mionzi tiba na kuhakikisha kuwa ugonjwa unatibiwa kwa ubora wa hali ya juu.

Akichangia maada hiyo Kaimu Mkuu wa Kliniki ya Bima, Dkt Emmanuel Lugina alisema, huduma hii ni muhimu sana hasa ikizingatia kuwa saratani ya mlango wa kizazi ni Saratani inayoongoza kwa idadi ya wagonjwa, hivyo wahudumu wa afya wanapowaona wagonjwa wajikite katika kuwafanyia uchunguzi (clinical examination) na pia kuweka kumbukumbu (documentation) ili kuweza kupanga aina ya mionzi tiba ambayo itamfaa mgonjwa na pia katika kuongeza tafiti katika eneo hili.

Naye Dkt Nuru Mlagalila alichangia kuwa huduma hii ya mionzi tiba ni muhimu kwa wagonjwa wetu wanaotufikia katika taasisi kwa kuwa wengi wa wagonjwa wanafika katika hatua ya pili na ya tatu, ambapo wakipata huduma hii watapata matokeo mazuri ya tiba.

Huduma hii inatolewa kwa ushirikiano wa daktari bingwa wa saratani (clinical Oncologist), Mfizikia Tiba (Medical Physicist), mtaalamu wa mionzi tiba (Radiation Therapist), na wauguzi (Brachytherapy Nurse).

Huduma hii inapatikana katika Taasisi ya Saratani ya Ocean Road Block C kwenye chumba cha Mionzi ya Ndani kila siku kuanzia saa mbili na nusu asubuhi hadi saa kumi na moja jioni Jumatatu hadi Ijumaa.