Waziri wa afya Mhe. Jenista Mhagama ametembelea katika Taasisi ya Saratani Ocean Road kuona utoaji huduma za tiba mionzi zinavyoendelea katika Taasisi kwa wagonjwa wa saratani.

Mh. Mhagama amejionea kukamilika kwa matengenezo ya mashine ya LINAC ambayo ilipata changamoto leo asubuhi na kupongeza uongozi wa Taasisi kwa kuhakikisha mashine inafanya kazi ili kuondoa usumbufu kwa wagonjwa.

Mhe Waziri amepongeza kwa kutengenezwa kwa mashine hiyo moja iliyokuwa inasumbua

Hata hivyo, Mhe. Mhagama ameongea na wagonjwa mbalimbali wanaopata huduma katika Taasisi na kuingeza kuwa, serikali ipo mbioni kuongeza mashine nyingine ya Tiba mionzi ili kuondoa shida zinazotokana na uchache wa mashine.

Kwa upande wake Mkurugenzi Mtendaji wa Taasisi ya Saratani Ocean Road Dkt. Julius Mwaiselage ameishukuru serikali kwa kufanya mchakato wa kuongeza mashine nyingine ya Tiba mionzi itakayokuja hivi karibuni kwani wagonjwa wa saratani wamekuwa wengi kuhitaji huduma za tiba mionzi.

Naibu waziri mkuu wa Jamhuri ya Muungano wa Tanzania Mhe. Dkt. Doto Biteko amezindua mpango kazi wa Taifa wa haki na ustawi wa watu wenye Ualbino (MTHUWWU) na mkakati wa Taifa wa Teknolojia saidizi.

Akizungumza katika maadhimisho ya kilele cha siku ya watu wenye ulemavu nchini, yaliyofanyika katika ukumbi wa Diamond jubilee uliopo Upanga jijini Dar es salaam, Dkt.Biteko amesema kuwa, mpango huu uliozinduliwa naye, ni muhimu kufuatiliwa na kuhakikisha umefanikiwa kwani watu wote nchini ni walemavu watarajiwa na hatujui lini tutapatwa na madhila hayo.

Dkt. Biteko amewaagiza wakuu wa mikoa yote nchini kuhakikisha kuwa wanasimamia maagizo hayo katika maeneo yao ya kazi kwani kwa upande wao ni rahisi mno kwakuwa wapo karibu sana na jamii.

Taasisi ya Saratani Ocean Road nayo imeshiriki katika shughuli hiyo kama mdau mkubwa wa watu wenye Ualbino ambapo imetoa mafuta kwa watu wenye ualbino waliobahatika kutembelea katika banda letu huku wakitoa elimu mbalimbali pamoja na vipeperushi ili kuwapa watu nafasi ya kujifunza mambo mengi kuhusu ualbino

Dkt. Maguha Stephano ambae ni meneja wa huduma za kinga katika Taasisi ya Saratani Ocean Road amesema kuwa mafuta hayo yametolewa bila malipo yoyote huku akiendelea kuwaasa wananchi kusogea katika banda hilo ili kujipatia mafuta hayo pamoja na kujifunza mambo mengine mengi yanayohusiana na saratani pamoja na ualbino.

Mkurugenzi Mtendaji wa Taasisi ya Saratani Ocean Dkt. Julius Mwaiselage leo amekutana na madaktari kutoka nchini India wa “Tata memorial Hospital”

Dkt. Mwaiselage amewaelezea namna Taasisi ya Saratani Ocean Road inavyofanya majukumu yake katika kuwahudumia wagonjwa wa Saratani.

Pamoja na hayo Dkt. Mwaiselage amewaambia kuwa milango ipo wazi ya kushirikiana baina ya Taasisi ya Saratani Ocean Road na Tata Memorial Hospital katika nyanja za utafiti, matibabu na sehemu nyingine katika maswala ya saratani.

Aidha madaktari hao kutoka Tata Memorial Hospital wamepata fursa ya kufanya ziara katika moja ya maabara za Taasisi ya Saratani Ocean Road, mashine ya Tiba mionzi ya Colbat, kwenye tiba kemia pamoja kwenye jengo la Pet na Cyclotron.

Madaktari hao kutoka Tata Memorial Hospital wamesema wao wapi tayari kwa kushirikiana na Taasisi ya Saratani Ocean kutegemea na mahitaji ya Taasisi yatakavyokuwa.

Waziri wa afya Mh. Jenista Mhagama leo ametembele katika Taasisi ya Saratani Ocean Road kuona huduma za Tiba mionzi zinavyoendelea katika Taasisi hiyo.

Mh. Mhagama amejionea mashine za Linac na Colbat ambazo zinatumika katika kutoa huduma ya Tiba mionzi kwa wagonjwa wa Saratani.

Ikiwa Taasisi ya saratani Ocean Road Ina mashine mbili za Linac na moja kati ya hizo bado inahitilafu.

Aidha Mhe. Mhagama amesema wakati akizungumza na wananchi waliokuwa wanasubili matibabu amesema serikali ipo mbioni kuongeza mashine nyingine ya Tiba mionzi ili kuondoa shida zinazotokana kwa kuharibika kwa mashine.

Aidha upande wake Mkurugenzi Mtendaji wa Taasisi ya Saratani Ocean Road Dkt. Julius Mwaiselage ameishukuru serikali kwa kufanya mchakato wa kuongeza mashine nyingine ya Tiba mionzi itakayokuja hivi karibuni.

“Tiba shufaa kuingizwa katika mtaala wa mafunzo ya afya nchini”, hayo yamesemwa leo na Mkurugenzi Msaidizi wa huduma za utengemao, Tiba shufaa na wazee kutoka wizara ya afya Dkt. Mwinyikondo Amir kwa niaba ya Waziri wa Afya Mhe. Jenista Mhagama katika maadhimisho ya siku ya Tiba shufaa Duniani.

Maadhimisho hayo yamefanyika katika viwanja vya Taasisi ya Saratani Ocean Road jijini Dar es salaam na kuhudhuriwa na wadau mbalimbali wa afya nchini.

Dkt. Mwinyikondo kwa niaba ya Waziri wa Afya Mhe. Mhagama amesema wizara ya afya ipo katika mchakato maalum wa kuingiza Tiba shufaa katika mtaala wa mafunzo ya afya nchini.

Ameendelea kusema serikali inawashukuru wadau mbalimbali wa Tiba shufaa nchini kwa kuwapa mafunzo watumishi wa afya ili kuongeza wataalamu wa Tiba shufaa nchini.

Tiba shufaa hutolewa kwa ushirikiano shirikishi wa wataalamu wenye taaluma mbalimbali wakiwemo madaktari, wafamasia, wauguzi, maafisa ustawi wa jamii pia wataalamu wa saikolojia, wataalamu wa magonjwa ya akili, wataalamu wa lishe, viongozi wa dini na wengine kutokana na uhitaji wa mgonjwa.

Dkt. Mwinyikondo ameipongeza Taasisi ya Saratani Ocean Road kwa kuanza kuwatembelea wagonjwa na kuwapelekea huduma pale walipo hasa majumbani.

Huduma hiyo ya majumbani ni kitendo ambacho itasaidia sana kupunguza idadi ya wagonjwa mahospitalini.

Kwa upande wake Mkurugenzi Mtendaji Dkt. Julius Mwaiselage amesema karibia asilimia themanini ya wagonjwa wa Saratani wanaitaji huduma ya Tiba shufaa.

Na Taasisi ya Saratani Ocean Road imejikita katika kuimarisha huduma za Tiba shufaa zinazotolewa katika Taasisi na majumbani.

Pamoja na hayo Dkt. Mwaiselage amesema upatikanaji wa dawa ya Morphine ni asilimia miamoja zinapatika katika Taasisi.

Mkurugenzi Mtendaji wa Taasisi ya saratani Ocean Road Dkt. Julius Mwaiselage amepokea vikombe vya ushindi vya Taasisi ya saratani Ocean Road katika mashimdano ya Mei Mosi Taifa 2024 yaliyofanyika mkoani Arusha.

Taasisi ya saratani Ocean Road imekuwa mshindi wa Kwanza katika mchezo wa bao kwa wanaume, huku ikishika nafasi ya tatu kwa wanaume kwenye mbio za baiskeli.

Dkt. Mwaiselage amewapongeza washiriki wote walio iwakilisha Taasisi katika mashindano hayo ya Mei Mosi huku akisema kuwa Taasisi ya Saratani ni kubwa na imebarikiwa kiasi kwamba pamoja na kutoa huduma za matibabu ya Saratani, wanashiriki na kushinda katika michezo mbalimbali.

Wakati huo huo Dkt. Mwaiselage kipekee amewapongeza mshindi wa Kwanza wa Bao Bw. Moshi Mteta na mshindi wa tatu wa mbio za Baiskeli Bw. Stephen Sanga, huku akisisitiza wengine kuongeza juhudi ili wakati ujao tupate makombe mengi zaidi.

Dkt. Mwaiselage amesisitiza ushiriki wa mazoezi kila jumamosi kama ishara ya kuunga mkono agizo la waziri mkuu wa Jamhuri ya Muungano wa Tanzania Mhe. Kassim Majaliwa Majaliwa lakini pia kujiweka katika hali ya kuepukana na athari za magonjwa yasiyoambukizwa.

Kamati ya kudumu ya Bunge ya Afya na Masuala ya UKIMWI imetembelea Taasisi ya Saratani Ocean Road mapema leo tarehe 23/02/2024

ili kujionea utoaji wa huduma na miradi mbalimbali iliyopo katika Taasisi hiyo.

Kamati hiyo ikiongozwa na Makamu Mwenyekiti, Mhe Dkt. Faustine Ndungulile wameipongeza Taasisi ya Saratani Ocean Road kwa kuweza kuisimamia miradi inayotekelezwa kwa fedha nyingi kwa ustadi wa hali ya juu.

Miradi hiyo ikiwemo mradi mpya wa PET/CT Scan na Cyclotron ambao umeghalimu zaidi ya kiasi cha Shilingi bilioni 18, na upo tayari kwa kuanza kutumika mapema iwezekanavyo.

Miradi mingine ni wa mashine ya MRI, CT- Scan, na ujenzi wa jengo la Multipurpose Oncology.

Pamoja na hayo Dkt. Ndungulile ametoa pongezi kwa huduma bora na za kipekee zinazotolewa katika Taasisi hiyo ikiwemo misamaha ya takribani Tshs 2.2 bilioni kila mwezi hasa ukizingatia kuwa wengi wa watanzania hawana uwezo wa kujihudumia kutokana na maradhi hayo.

Aidha kwa upande wake Naibu Waziri wa Afya, Mhe Dkt. Godwin Mollel amesema Serikali inaongeza jitihada za kupeleka huduma za saratani katika hospitali za kanda ili kuipunguzia mzigo Taasisi na tayari kanda zote zinahuduma ya tiba saratani; na kuongeza ya kwamba Wizara imeiagiza Ocean Road kujenga kituo cha saratani Mbeya na ujenzi utaanza katibuni. Aidha, amesema kwambw Wizara imepokea maelekezo na ushauri wa Kamati na itayafanyia kazi kwa ustawi wa sekta ya afya nchini.

Awali Mkurugenzi mtendaji wa Taasisi ya Saratani Ocean Road Dkt. Julius Mwaiselage akiwasilisha ripoti alieleza mafanikio mengi ya utoaji huduma za kinga, uchunguzi, tiba, mafunzo na utafiti pamoja na changamoto zilizopo katika Taasisi zinapungua kadiri muda unavyokwenda kwa kuwa serikali inatoa mchango mkubwa katika kukabiliana na changamoto hizo.

SERIKALI imetoa rai kwa jamii kuchukua hatua za mapema kupima ugonjwa wa saratani, kufanya mazoezi na kufuata mtindo bora wa maisha, kwani kuna ongezeko kubwa la wagonjwa, huku asilimia kubwa ya waathirika wakiwa ni wanawake.

Akizungumza leo jijini Dar es Salaam katika maadhimisho ya siku ya saratani duniani kwaniaba ya Waziri wa Afya Mhe. Ummy Mwalimu, Mkurugenzi wa Huduma za Afya na Ustawi wa Jamii kutoka Ofisi ya Rais Tawala za Mikoa na Serikali za Mitaa (TAMISEMI) Dk. Rashid Mfaume, amesema hadi kufikia mwaka 2030 athari za saratani zitakua mara mbili zaidi hasa katika nchi zenye kipato cha chini.

Pia amemshukuru Rais Dk. Samia Suluhu Hassan, kwa uwekezaji mkubwa aliyoufanya katika Taasisi ya Saratani Ocean Road (ORCI), ambapo ametoa zaidi ya shilingi bilioni 18 za ununuzi wa vifaa tiba.

Alisema kutokana na uwekezaji mkubwa uliyofanyika kuna wagonjwa kutoka Zambia, Comoro , Msumbiji , Burundi na Kenya ambao wanafika ORCI kupata matibabu.

Naye Mkurugenzi mtendaji wa Taasisi ya Saratani Ocean Road (ORCI) Dk. Julius Mwaisalage, amemshukuru Rais Dk. Samia Suluhu Hassan, kwa uwekezaji mkubwa anaoendelea kuufanya katika taasisi hiyo, ikiwemo ununuzi wa mashine ya kisasa ya uchunguzi wa saratani.

Alisema saratani inayoongoza ni ya Mlango wa kizazi inafuatiwa na saratani ya matiti.

Dk. Mwaisalage amesema ORCI inaendelea kusimamia utoaji huduma za kibingwa kuanzia kinga na uchunguzi huku akisema, maadhimisho ya siku ya saratani mwaka huu yana kauli mbiu isemayo ‘Saratani inatibika huduma sawa kwa wote’.

Naye Mwakilishi kutoka Shirika la Afya Duniani (WHO) Dk. Alphoncia Nanai, amesema katika kipindi cha mwaka 2022 kwa ukanda wa Afrika wagonjwa wa saratani walikua ni zaidi ya 800,000, huku takribani 600,000 wakipoteza maisha.

Shughuli hii imeambatana na uzinduzi wa mchezo wa Afya game ambapo kwa shilingi 500 tu utachangia mgonjwa wa Saratani huku ukijiweka katika nafasi ya kushinda pikipiki, Nyumba na simu kibao, mchezo huu umeandaliwa na wamata kwa udhamini wa Infinix